Bakıda keçirilən Cüdo üzrə Dünya Çempionatının loqosu və vizual identikası

Bakıda keçirilən Cüdo üzrə Dünya Çempionatı 2026 üçün loqo və vizual identikanı bakılı Marka Design Studio hazırlayıb. Behance-dəki layihədə müəlliflər kimi Rizvan Bağırlı, Leyla Firudinli və Murad Asadov göstərilib. Loqonun əsasında alov dayanır. Studiya onu Azərbaycanın, Odlar Yurdunun rəmzi kimi seçib: alov həm də yarış ruhunu və idmana olan ehtirası ifadə edir. Alovun içində tanınmış cüdo fəndini icra edən iki idmançı görünür. Vizual identika da bu ideya üzərində qurulub: müxtəlif cüdo fəndlərinin illüstrasiyaları alov formasına yerləşdirilib. Palitra qırmızı, bənövşəyi, qızılı və qara rənglərdən ibarətdir, şrift isə Albert Sans-dır. Üslub bayraq və bannerlərdə, arenanın tərtibatında, sosial şəbəkə postlarında, geyim və suvenirlərdə tətbiq olunub. Mənbə: Marka Design Studio, Behance